Հայաստան – Լուրեր – Լրատվություն - Օրաթերթ: «Տատիկիս դաջվածքները» ֆիլմը Ստամբուլում հուզել է թուրք հանդիսականին

«Տատիկիս դաջվածքները» ֆիլմը Ստամբուլում
հուզել է թուրք հանդիսականին
================================================================================
tert.am on 16/03/2012 14:30:00

Ստամբուլի ֆրանսիական մշակույթի կենտրոնում
մարտի 15-ին ցուցադրվել է Սյուզան Խարդալյանի
«Մեծ մորս դաջվածքները» ֆիլմը: Այն
ներկայացվել է Ստամբուլի Filmmor Կանանց
միջազգային կինոփառատոնի շրջանակներում:

Կինոդիտումն անցկացվել է լեփ-լեցուն
դահլիճում. ներկա են եղել թուրքական
ընդդիմության ներկայացուցիչներ,
գիտնականներ, բազմաթիվ հայտնի մարդիկ, ինչպես
նաև` Հրանտ Դինքի ընտանիքի փաստաբանը: Այն
այնպիսի մեծ հաջողություն է ունեցել, որ
կրկին է ցուցադրվել:
Ցուցադրությունից հետո, թուրք
հանդիսատեսներից մեկը, ում անունը չի նշվում,
էլեկտրոնային հաղորդագրություն է ուղարկել
ֆիլմի ռեժիսոր Սյուզան Խարդալյանին (նա ներկա
չի եղել ֆիլմի ցուցադրությանը), որտեղ կիսվել
է իր տպավորություններով:
«Ցուցադրությունից հետո բոլորն անչափ
հուզված էին, ոչ ոք չէր խոսում, նայում էինք
մեկմեկու: Մի պահ ես ինքս ինձ այնքան մեղավոր
և կեղտոտ զգացի…ուզում էի բարձր գոռալ:
Ամբողջ ճանապարհին դեպի տուն ես լուռ էի:
Հասնելով դռանը` մի պահ նայեցի երկնքին,
աստղերն այնքան պայծառ էին շողում…դրանք ինձ
օգնեցին իմ մեջ ուժ գտնել` լուսավոր ապագային
հավատալու»:
Մեկ այլ թուրք հանդիսատեսի` Խարդալյանին
ուղարկված հաղորդագրության մեջ նշվել է, որ
բազմաթիվ գրավոր սպառնալիքներ են ուղարկվել
Filmmor Կանանց միջազգային կինոփառատոնի
կազմակերպիչներին, սակայն վերջիններս տեղի
չեն տվել, և ֆիլմը, այնուամենայնիվ,
ցուցադրվել է:
Կինոնկարի ծանուցման մեջ գրված է .«Մեծ մայրս
մի քիչ տարօրինակ էր, ոչ ոք նրան չի սիրել,
նրան երբեք չեն գրկել: Նրա ձեռքի և դեմքի
վրայի կապույտ դաջվածքները սարսափազդու էին:
Սատանայական նշաններ հիշեցնող այս
դաջվածքները վախ էին ներշնչում: Ո՞րն էր մեծ
մորս սխալը, ինչո՞ւ էր նա այդքան տարօրինակ:
Ո՞վ էր այդ դաջվածքներն արել. նման հարցեր
տալը սխալ էր: Մեծ մոր մասին խոսելն արգելված
էր»:
Ֆիլմը կցուցադրվի նաև Վանում, Հաքյարըում և
Չանաքքալեում:
Նշենք, որ վերջերս ֆիլմը ցուցադրվել է
Շվեդիայի պետական հեռուստատեսությամբ, ինչի
կապակցությամբ տեղի թուրքական համայնքը մեծ
աղմուկ էր բարձրացրել: Նրանք հազարավոր
բողոքի նամակներ են ուղարկել
հեռուստաընկերությանը: