Հայաստան – Լուրեր – Լրատվություն - Օրաթերթ: Հերթական խորհրդակցությունը մարզպետների մասնակցությամբ

Հերթական խորհրդակցությունը մարզպետների
մասնակցությամբ
================================================================================
Oratert News portal on 27/01/2012 21:44:00

ՀՀ փոխվարչապետ, տարածքային կառավարման
նախարար Արմեն Գեւորգյանի մոտ այսօր տեղի
ունեցավ մարզպետների մասնակցությամբ
հերթական խորհրդակցությունը:
Գյուղատնտեսության նախարար Սերգո
Կարապետյանի մասնակցությամբ քննարկվեցին
հողօգտագործողներին մատչելի գներով
ազոտական պարարտանյութի ձեռքբերման
նպատակով պետական աջակցության ծրագրի
իրականացմանն առնչվող հարցեր:

Նշվեց, որ պարարտանյութի փոխադրման եւ
պատվիրված խմբաքանակը համայնքներ հասցնելու
գործընթացն իրականացվելու է կազմակերպված`
կառավարության ջանքերով եւ համապատասխան
մարզպետի աջակցությամբ, իսկ համայնքապետերն
արդեն տեղեկացված են, որ տեղերում պետք է
կազմակերպեն բեռնաթափման, բաշխման
աշխատանքները:
Փոխվարչապետը մարզպետներին հանձնարարեց
ուշադրության կենտրոնում պահել գործընթացը`
մեկ անգամ եւս հիշեցնելով, որ պարարտանյութի
յուրաքանչյուր պարկի դիմաց պետք է գանձվի 6000
դրամ եւ ոչ ավելի:
Անդրադարձ եղավ նաեւ սերմնաբուծության եւ
սերմարտադրության ծրագրի շրջանակում
գյուղացիական տնտեսություններին տրամադրված
սերմացուի վերադարձելիության գործընթացին:
Մարզպետներին ներկայացվեց անցած տարվա
համեմատ 2012թ. համայնքների բյուջեների
պլանային ցուցանիշների վերլուծությունը:
Փոխվարչապետը նկատեց, որ ցուցանիշների
նվազեցման պարագայում պետք է ներկայացվեն
համապատասխան հիմնավորումներ:
Տեղեկացվեց նաեւ, որ մարզպետարաններում
նախատեսվում է ներդնել կենտրոնական
գանձապետական համակարգի "գործառնական օր"
ծրագիրը: Այն արդեն գործում է
նախարարությունում, որի միջոցով հնարավոր է
օրական կտրվածքով հետեւել համայնքների
եկամուտների հավաքագրմանը:
Բացի այդ, համայնքների հարկային բազաների
կառավարման արդյունավետության նպատակով
աշխատանքներ են իրականացվում գույքահարկի եւ
հողի հարկի ավտոմատացված համակարգը
հանրապետության ողջ տարածքում կիրառելի
դարձնելու համար: Համակարգն արդեն ներդրվել
եւ հաջողությամբ գործում է համայնքային որոշ
միություններում:
Խորհրդակցության ընթացքում քննարկվեցին մի
շարք այլ հարցեր եւս: