Հայ պրոֆեսիոնալ բռնցքամարտիկ Արթուր Աբրահամը տոնեց իր 34-րդ հաղթանակը

Գերմանիայի Կիլ քաղաքում հայ պրոֆեսիոնալ բռնցքամարտիկ Արթուր Աբրահամը մրցեց լեհ Պյոտր Վիլշեւսկու հետ:

 Իր կարիերայի 37-րդ մրցամարտում 33-ամյա Արթուր Աբրահամը կարողացավ պարտության մատնել մեկ այլ փորձառու մարզիկի, ով 33-րդ անգամ էր դուրս գալիս պրոֆեսիոնալ ռինգ:

Հաղթանակի համար Աբրահամը մեծ ջանքեր թափեց, սակայն ողջ մրցամարտի ընթացքում Արթուրն ուներ ընդգծված առավելություն:

Հենց մեկնարկայից նկատելի էր, որ Արթուրն այս մրցամարտում հաղթելու շատ մեծ հնարավորություններ ունի: Գերմանիան ներկայացնող հայ բռնցքամարտիկը գրագետ պաշտպանվում էր ու ժամանակ առ ժամանակ վստահ գրոհներ էր ձեռնարկում, որոնք ընթացքում ավելացնում էր միավորների քանակը: 

Թեեւ Աբրահամի բազմաթիվ հարվածներ հասան նպատակին, բայց բոլոր 12 ռաունդներն էլ անցան առանց նոկդաունների: Մրցամարտի միջնամասում էլ Վիլշեւսկին նկատողություն ստացավ գլուխը կախած մենամարտելու համար, որից հետո արդեն Աբրահամի հաղթանակը կասկած չէր հարուցում:

Վերջին 12-րդ ռաունդից հետո մրցավարների որոշմամբ հաղթանակը շնորհվեց Արթուր Աբրահամին, ով 34-րդ հաղթանակը տոնեց իր կարիերայում՝ պաշտպանելով WBO-ի վարկածով սուպերմիջին քաշային կարգում Եվրոպայի չեմպիոնի կոչումը:

Հիշեցնենք, որ Արթուր Աբրահամն այս տարի երկրորդ հաղթանակ տոնեց: Հունվարին հայ բռնցքամարտիկը նոկաուտով առավելության էր հասել արգենտինացի Պաբլո Ֆարիասի նկատմամբ: 

Արթուր Աբրահամ-Պյոտր Վիլշեւսկի՝ 118:109, 118:109, 119:108